تقرير حفلة الأوبرا 3_3_2009 بالتفصيل

[omero the king]

طبعا انا لغاية دلوقتى مش مستوعب انى دخلت الحفله بس المهم ان انا دخلت متأخر عشان كنت رجعت من الاوبرا لغاية اكتوبر عشان البس بدله فحضرت من اول الرزق على الله العالميه وده ترتيب الاغانى :
1- الليله يا سمره
2- حتى حتى
3-على صوتك
4- الرزق على الله
5- يونس( عبدالله حلمى و بس )
6-نعناع الجنينه ( عبدالله حلمى فى اخر الاغنيه دخل بصولو و المفروض كانت الاغنيه تخلص فمنير قاله بنرفزه ليه ما خلاص خلصت و بعد كده عجبه الصولو فقعد يهزر معاه )
7- اشكى لمين
ده الجزء الاول من الحفله و كده كله افتكر ان منير ماشى , بعد كده لقيت شريف نور بيزعأ و بيقول انا عايز اشرف و مامى و عبدالله و حازم ميمشوش عشان لسه فيه تانى و فجأه لقيت فرقه اسبانيه نزلت على المسرع اللى تحت مسرح منير و فرقة منير فوقيهم ( المسرح كان درجتين ) و لعبو مزيكا شرقى اسبانى ملهاش حل و ماريا غنت الدخله بصوتها القوى جدا و منير واقف جنبها و راح مغنى كوبليه بالعربى جامد اوى بيقول فيه امان امان بس مش فاكره اوى , 1-عد كده الفرقتين لعبوا شمندوره بمزيكا شرقى اسبانى و ماريا غنت معاه شمندوره بالاسبانى ( رهيييييييييييييييييييبه) و 2_ لعبوا يالالى بمزيكا ملهاش حل و برضوا غنت ماريا معاه بالاسبانى , بعد كده الفرقتين نزلوا و فضل منير و ماريا لوحدهم على المسرح هيا تغنى من غير مزيكا كوبليه اسبانى و منير يرد عليها اول مره 1-بعد الطوفان
2-واننى
3-حدوته مصريه (لا يهمنى اسمك)
بجد يا جماعه الحفله كانت عالميه بالرغم من انها تقريبا كانت ساعه و نص
wait 4 vedios

اقتباس المشاركة الأصلية كتبت بواسطة حرة منير اهلين يااخواتي وحبايبي... عفوا على تاخيري ف التقرير...لكن كل ده طبعا بفوق من الحفله...لاني برجع بعد اي حفله ل(منير) مش فاكره اسمي.... مبدئيا وقبل مابدا في التقرير...عايزه اوضح فكرة امكانية الدخول لهذه الحفله عشان ناس كتير سالتني عليها... الدخول كان صعب جدااا..والمره دي اكتر من اي حفله خاصه..حتى بتوع السفاره الاسبانيه لما كلمتهم قالولي لو انتي عرفتي تجيبي اي دعوه ياريت تاخدينا ف ريح طيفك عشان احنا نفسنا مخدناش ومجموعه من الاسبان بس اللي خدوا والدعاوي بالاسامي...حتى محمود رضوان الشاعر بيقللي لو معاكي اي سكه قوليلي..ميدو منيب ذات نفسه قرر يتفرج عالماتش وقال مش هروح لاني معييش حاجه اروح بيها... يعني الدخول كان صعب جدا ..حتى ابو اليزيد بعد ماكان كل حفله بيكون معاه حوالي 500 دعوه..ف الحفله دي تقريبا مكنش يملك ف ايده اكتر من 200...لان كان كل الدعوات من جامعة الدول او من الجهات المنظمه بالاسامي والامن كان مشدد بشكل زايد.... واليكم هذا التقرير المتواضع والشامل الكامل .... دخلت المسرح الكبير وقعدت ف الصف التاني ف النص قدام (منير) مباشرة...و قبل ما يقدموا برنامج الحفله.. طلع عمرو موسى اتكلم وبعض من المسؤلين الاوروبين...وقدموا برنامج الحفل ...وقالوا برنامج الحفل هيكون كالاتي...-ماريا دليمار هتغني ...بعض من اغانيها ....-ثم بعد ذلك هينورنا الرائع (منير)..بعد كده بريك و-هيقدموا ديويتو من اغانيهم سوا.... دخلت ماريا دليمار ....ومع اول اغنيه المكريفون قطع صوت وفضل فتره كده حوالي 6 دقايق...فضلت احمد ربنا ان محصلش كده مع (منير)...وغنت حوالي تلات ارباع ساعه ...على 10 الا ربع ..طلع (حبيبي).. وقبل مايظهر هو....ظهر صوته الساحر بدون موسيقى وهو بيقول (خلي النداااااا من احلامك يسقي النبات من ايامك)...وبعدين اشتغلت الموسيقى.. وطلع (منير) عالمسرح..وكان على مكان مرتفع من المسرح...يعني مش عالمسرح نفسه هو والفرقه.... دخل (منير) ب: -الليله ياسمره .. وقال بعدها... (انا سعيد باني بعمل هذا الحفل اللي هدفه توطيد العلاقات بين الدول العربيه والاوروبيه ووجه تحيه للحضور ولجامعة الدول والمنظمه الاوروبيه)....و(منير) الحمد لله..طول الحفله رااايق ومبسوط...ربنا يسعده ويفرحه ويطمنه دايما يارب.. -يونس... -حتى حتى وجزء منها نوبي.. -علي صوتك... -الرزق على الله...وقبل مايغنيها قال (ممكن كل حاجه يبقى فيها شراكه ...الا المال ..وابتسم ..هنجيب منين...يبقى الرزق على الله وراح مغنيها) واحد من الحضور قالله -سقطت ف الحليب مابينتله عكاره-..قالله نعم ...قام عادها تاني ...(منير) قالله : (يلهوي....سقطت في الحليب مابينتله عكاره..صعبه قوي عالناس)..- وبعدها مباشرة قام مغنيها -(نعناع الجنينه)....(حبيبي) وختم هذا الجزء الخاص بغناه هو فقط ب-(ريميكس الدنيا ريشه واشكي لمين).. جتلي صدمه عصبيه فضلت اعيط واقول متمشيش...لاني افتكرتها اخر اغنيه ..ومكنتش عارفه ان في جزء تاني لان البرنامج اتقال بالاجنبي وانا مش فاهمالهم طبعا...معرفتش ترجمة البرنامج غير بعد الحفله ماخلصت....لازم نعرف لغات يااخوانا... بعد كده بريك ..ومشيو الفرقه ..ودخلت فرقة ماريا والفرقه الشاميه....وفرقة (حبيبي) دخلت تاني بعد مامشيت شويه... وطلعوا (منير) وماريا سوا... غنى (منير) امان امان وماريا غنت معاه .....-وكانوا حاطين قدامهم ستاند عليه الكلمات عشان ماريا مش حافظه كويس- وبعد كده شمندوره ..غناها (منير) ..وماريا غنت كوبليهات منها بالاسباني...لكن (منير) مغناش ولا كلمه اسباني بتاااااتا...وماريا هي اللي غنت اغانيه حتى النوبي بالاسباني لكن غنت اغانيه هو...مش هو اللي غنى اغانيها ...(لان فعلا القائد هو (منير) وهو اللي بيفرض ثقافته ..مش حد بيفرض ثقافته عليه....لان هو ده (منير) اللي بنالي هويتي اللي كلام الكون مايكفيه).. وياللي ..برضو شاركته فيها بالاسباني.....و(منير) كان راااااااائع فيها وصوته حنين وجميل وقوي ف نفس الوقت كما العااااااده.... بعد كده هي تغني اسباني و(منير) يغني اغانيه... في الوقت ده (منير) قال: (اللي بقدمه دلوقتي ده نوع من انواع الخلط الموسيقي..احنا لازم نعرف كل انواع الموسيقى...واحنا دلوقتي بنقدم الخلط الموسيقي ده) وعلى هذا النهج ...(منير) ربي يحميه ويزيده تالق يارب قال: قبل الطوفان من غير موسيبقى...ولما عاد الكوبليه تاني ...قال بعد الطوفاااان... وقال ويانني تو كيري برضو من غير موسيقى...اللي غناها ف فيلم الطوق والاسوره... وحدوته مصريه برضو من غير موسيقى...لغاية يهمني الانسان ولو ملوش عنوان.. في التلات اغاني دول اللي من غير موسيقى..كان صوتي بيون مع (منير) ف القاعه..تلقائي من غير مااحس انا ...كانت الصاله كلها هس هس ..و(منير) بيغني وانا صوتي عالي جدا وبغني معاه كلمه كلمه...و(منير) فضل يبصلي جامد ف الوقت ده اكتر من اي وقت..وكاني بغني معاه انا ....وناسيه الدنيا من حواليا..وعبير عماله تغمزني عشان تقللي اهدي شويه وانا مش حاسه بحاجه غير ب(منير)..يويويو وحدوته مصريه كانت اخر حاجه للاسف... الناس اللي كنت وسطهم كانوا قاعدين محترمين ف الاول وتلات ارباعهم اجانب....ومع وجود ماريا لغاية قبل مايطلع (منير) كنت شبه نايمه تقريبا...اول ماطلع (منير) الجنان كله اشتغل ..والصويت ويري وسويري..وحركاته بجنون...وف الوقت اللي بين الاغاني اللي الصاله بتبقى فيها ساكته قلت (بحبك يا(منير)) بصوت يرن...بدل المره تلاته.. وجننت الموجودين حواليا حتى هما نفسهم بداوا يتفاعلوا....بلا سفرا بلا عمرو موسى ورايا بلا مظاهر فارغه...عند (منير) ومعرفش حد... بعد حدوته مصريه ..صوروا الصحفيين ماريا مع (منير)...و(منير) ف الاخر قال كفايه للتصوير.... و(منير) كان واكل الجو درجه اولى ...تقريبا محستش بوجود ماريا وهي مع (منير)..وبالمناسبه ف وسط الاغاني..حد جاب ل(منير) بوكيه ورد...قام (منير) اهداه لماريا...كلك انسانيه يا(منير).... وقلتله باي باي يا(منير)..قام عمل بايده باي باي ف الناحيه اللي كان واقف فيها.... خلصنا الحفله على 12 .... ونزل (منير) من عالمسرح وانا طيران وراه..ومعايا صحباتي عبير واسراء.. عشان اشوف خط سير (منير) ايه... راح عند الاوضه اللي مكتوب عليها غرفة -فنان- وقف شويه مع الناس...وبعدين دخل علطول الاوضه .. واتنين بودي جارد واقفين عليها... قعد حوالي تلت ساعه جوه..ودخلت قناة النيل لايف سجلت معاه... وانا معرفش القناه اللي سجلت معايا ايه زي العاده....يمكن تبقى النيل لايف برضو... وروح (منير) بالسلامه ...بعد حفل رائع ...كان متالق فيه وهو المبدع فيه كما عادته... ربنا يحميه يارب ويسعده ويزيده تالق وابداع ويوفقه...ويقدمله كل الخير ويطول ف عمره وينولني حلمي اللهم امين.. اكتر حاجه باسطاني ف الحفل ده ..بعد اني شفت (حبيبي)...انهم اختارو (منير) هو اللي يمثل الدول العربيه... هو ده الاصل وده الصح...ولا في حد غيره... انشا الله من تالق لتالق يا(منير)....ويارب مزيد من الراحه والرضا والسعاده والنجاح والطمانينه يارب... بالنسبه لتصوير الحفل....طبعا ممسكش انا ف حفلة (منير) كاميرا...لاني ببقى تايهه مع (منير) للركب...ولا شايفه قدامي غير (منير) ..حى ناس كنت مواعداها اسمعها اغاني من الحفل...نسيت خالص ومفتكرتش غير بعد الحفله...لما فقت شويه.. وناس هي اللي كلمتني ف الحفله وانا تايهه حتى حد منهم حب يبلغني خبر فوز الزمالك قاللي بشري (منير) الزمالك فاز....ده غير ان (منير) مبيحبش التصوير وانا بعشق اني اسمع كلامه.... لكن صحبتي وحبيبتي عبير صورت اجزاء كتيره منها ....بالتحديد الجزء اللي غنى فيه (منير) دون مشاركة ماريا... هاخدها منها وهرفعهالكو هنا انشا الله... وهعرف مين صور الجزء الباقي..واعزروني جامعتي بالبحوث والشغل والبلاوي الزرقا اللي فيها شاغلاني عن النت شويه .... لكن مش هتاخر عنكوا يا منايره.. في اي شئ يخص (منير) باذن المولى... الى الامام يا (منير)....يويويو....(منير)

[dr_ahmed_zorba]

اه يخويا مهو ان مكنش عصام يعمل التقرير يبقى انت التعملو

ماشي يا عم يسلمو

[mohamedyaheea]

شكرا ليك يا غالى

[boud!_moun!r]

ايوه بقى ياعمر الله يسهله يا معلم
وتسلم على التقرير الجامد و كويس والله انك حضرت وا صورت كمان تسلملنا يا مان
و انا مش عارف انا ايه حكاية عيلة ابوالركب دى مع التقارير :S:S:S:S:
انتم المفروض تعملوا شركه تسموها ابو الركب للتقارير:D:D:D
منتظزين الفيديوهات يا معلم وتسملنا مره تانيه
سلام

[!! Mr.SnoOopY !!]

هو إنت دخلت صحيييح يا زوربا ؟

والله يبني لما كلمتك كنا لبسنا انا وتوتا بس حصل ظروف كدة ومعرفناش نيجي

بس والله كان نفسي أجي :( وهو لو جينا كنا هندخل أصلا ؟

[shmandora]

يا بختك يعم
ياريتنا يا زوربا كنا سمعنا كلام بودى ورحنا اجرنا بدله من اى مكوجى
وتسلم يا حبى على التقرير
وننتظر فيديوهاتك بفارغ الصبر

[محمدالفوال]

الف شكر على التقرير يا بوب

[kafoory]

فين الفيديوهات ييا شباب يا جامد؟ لو سمحتوا اللي يرفعها يتأكد ان اللينك شغال, وربنا يخليكوا على الشغل الجامد ده...

[Tota_Mounir]

عائلة ابوة الركب للتقارير

اصلى يا واد يا عمر على التقرير ويبختك يا عم دخلت الله يسهلو

ملناش حظ بقي

[bats]

اصلي يا عمر و عاوزين فيديوهات لو فى
علشان اللى ما اتفرجش يتفرج